श्रम संस्कृति पार्टीको मंगलबार धरानमा सुरु भएको केन्द्रीय समिति बैठकको दोस्रो दिन बुधबार सुदन किराँती सहितका नेताहरु पनि सहभागी भएका छन्।
केन्द्रीय समिति बैठकको पहिलो दिन पार्टीसँग एकता गरेको करिब चार महिना नबित्दै पूर्वमन्त्री किराँती नेतृत्वको समूहलाई नै आमन्त्रण नगरिएपछि पार्टीभित्रको असन्तुष्टि बाहिर आएको चर्चा भएको थियो।
तर, अध्यक्ष हर्क साम्पाङ र वरिष्ठ नेता किराँती दुवै पक्षले पूर्व निर्धारित तालिका अनुसार नै पहिलो दिन पूर्व कमिटीको बैठक बस्ने र त्यसले एकता अनुमोदन गर्ने त्यसपछि दोस्रो दिन दुवै कमिटी बस्ने तय भएको बताउँदै आएका छन्।
पार्टी कार्यक्रम पूर्व निर्धारित भए पनि बाहिर अनावश्यक हल्ला चलेको महासचिव आरेन राईले बताएका थिए।
बैठकको पहिलो दिन सहभागी नभएका नेता किराँती स्वयंले बुधबार बैठकमा सहभागी हुने भनेर भ्रममा नपर्न आग्रह गरेका थिए।
श्रम संस्कृति पार्टीको केन्द्रीय समिति एकताअघि २३ सदस्यीय थियो।
किराँती नेतृत्वको समूहसँग एकता भएपछि एक उपाध्यक्ष, एक सचिव र १५ जना केन्द्रीय सदस्य थपिएका थिए।
त्यसपछि समिति ४१ सदस्यीय बनेको थियो।
एकताका क्रममा किराँतीलाई वरिष्ठ नेताको जिम्मेवारी दिइएको थियो।
त्यतिबेला अध्यक्ष साम्पाङले स्वयं सामाजिक सञ्जाल र सञ्चार माध्यममार्फत किराँतीलाई कोशी प्रदेशको भावी मुख्यमन्त्रीको सम्भावित उम्मेदवारका रूपमा प्रस्तुत गरेका थिए।
पूर्वी नेपालमा पार्टीको संगठन विस्तार तथा विभिन्न तहका जनप्रतिनिधिलाई पार्टीमा ल्याउने अभियानमा किराँती समूह पनि सक्रिय रहेको थियो।
पार्टीभित्र असन्तुष्टि हुँदै नभएको भने होइन।
किराँती निकट एक नेताका अनुसार चार महिनाअघि भएको पार्टी एकता यसअघि नै अनुमोदन हुनुपर्ने किराँती समूहको अडान थियो।
हर्क साम्पाङले विधिले भन्दा फेसबुकको निर्देशनका भरमा पार्टी चलाउन खोजेको भन्दै किराँती समूह सुरुबाटै सन्तुष्ट छैन।
'तर, हर्क र सुदन मिलेर जानुपर्छ भन्ने एउटा ठूलो जमात छ,' किराँती निकट ती नेताले भने, 'त्यसैले अहिले सानातिना अपमान सहेर भए पनि एकता जोगाउन हामी लागिरहने कुरा भएको छ।'
त्यसैले मङ्गलबारको बैठकमा आफ्नो पक्ष मात्रै बस्ने हर्कको अडान आफूहरुले मानेको ती नेताको भनाइ छ।
किराँती निकट नेताहरूले अध्यक्ष साम्पाङको कार्यशैलीप्रति असन्तुष्टि रहेको बताउँदै आएका छन।
पार्टीमा विधि र पद्धतिभन्दा सामाजिक सञ्जालमार्फत गरिने घोषणा तथा एकतर्फी निर्णय हाबी हुँदै आएको भनेर उनीहरूको असन्तुष्टि छ।
किराँती पक्षका नेताहरूले अध्यक्षको कार्यशैलीप्रति असन्तुष्टि जनाउँदै पार्टी सामूहिक निर्णय र संस्थागत प्रक्रियाबाट सञ्चालन हुनुपर्नेमा जोड दिने विषय केन्द्रीय समिति बैठकमै उठाउने बताएका छन्।
-ink-1778236542.jpeg)
